السلام عليكم و رحمة الله اخواني الأعزاء يسرني ان اقدم لكم قصيدة نضمتها بمناسبة غالية علينا جميعاً وهي اليوم الوطني للمملكة اتمنى ان تنال استحسانكم و العذر على القصور
يالله ياللي كلنا نلتجيبه = يا خالقٍ رازق رحيمٍ ورحمان
يالواحد اللي لا ولد لا صحيبه = تغفر ذنوبي كلها سر واعلان
وفق ضميرٍ كل جزلٍ يجيبه = مثايلٍ توزن على كف ميزان
الشعر يااهل الشعر وش حاجتيبه = اليا قصر في واجبه نحو الأوطان
اليوم يومٍ للوطن نحتفيبه = يبقى لنا ذكرى على كل الأزمان
ذكرى المليك اللي جمعنا بطيبه = من بعد ما كنا خصومٍ وعدوان
عبدالعزيز اللي كسا الدار هيبه = سطر لها في صفحة المجد عنوان
في مثل هذا اليوم قاد الكتيبه = كتيبة الشجعان ذربين الأيمان
ستين تعداد الرجال الصليبه = في وصفهم ماني مبالغ وغلطان
سارو وعين الله عليهم رقيبه = ليل ونهار ومن مع الله ما هان
خامس شهر شوال صبح حريبه = وعيَده في خامس عياده بشامان
نادى المنادي في الرياض العريبه = الحكم لله ثم لك يابن ((مرخان))
واصل كفاحه دون شكٍ و ريبه = من حدها الشرقي اليا حد نجران
على الرضا و الدين كلٍ رضيبه = حتى غدينا كلنا ربع واخوان
في دارنا في مملكتنا الحبيبه =بالروح نفداها شبابٍ وشيبان
اليوم في ذكرى بعيده قريبه = نستذكر الذكرى بشكرٍ وعرفان
بقيادة اللي له فعولٍ صعيبه = هذاك ابو متعب سلالة كحيلان
انا اشهد انه عز من يعتزيبه = وانا اشهد انه للوطن طود واركان
ولي عهده له يدينٍ رحيبه = للجود جود وللوطن درع وامان
الحلم طبعه و التواضع نصيبه = ولاجا نهار الحرب للحرب سلطان
واختامها عد الغصون الرطيبه = اللي تمايل في شجر كل بستان
صلوا على اللي كلنا نقتديبه = محمد المبعوث من نسل عدنان
للتوضيح مرخان هو الجد الأول لآل سعود حيث أن نسب الملك عبد العزيز هو :عبدالعزيز بن عبدالرحمن بن فيصل بن تركي بن عبد الله بن محمد بن سعود بن محمد مقرن بن مرخان
مواضيع لم
تغذية rss
أفضل 20عضو
أفضل اعضاء اليوم
جديد المواضيع
مشـــــاركاتي
قوانين المنتدى
التسجيل
23/9/2010, 5:40 am
