لطريقه دى يا فتوكاتى واخداها من كتاب أجنبى
الطريقه إسمها (( OLD FASHIONED APPLE PIE )) هى الطريقه التقليديه القديمه للأمريكان فى عمل فطيرة التفاح ...هم فى الأمريكتين بيسموها (فطيرة جدتى )
لا تحتوى على بيكنج باودر خالص..و لا فانيليا ... و العجين فيها خل
محدش يستغرب بقى ..مليش دعوه .... هى دى طريقة الأمريكان زمان ...أنا بأعملها و بتطلع جنان ..جنان
أنا علًمتها لأخت زوجى لما زوجها ذاقها عندى و إتجنن عليها ... روحت لها مخصوص و علمتها لها .. و حماتى دايما بتنتظر نصيبها لما بأعملها و بتقول لى دى أحلى فطيلرة تفاح كلتها فى حياتى .. ما شاء الله و الحمد لله
..و أنا مش حأبخل عليكم بالطريقه
المقادير :
(ربع كوب ماء + بيضه + ملعقه كبيره خل )
2 كوب دقيق
نصف ملعقه صغيره ملح
( ربع كوب زيت + ربع كوب سمن )
للحشو :
5 أو 6 تفاحات مقطعين شرائح رفيعه
2 كوب سكرعادى
2 ملعقه كبيره زبد
3 ملاعق كبيره قرفه ( كمية القرفه حسب الرغبه )
الطريقه :
1- إخلطى (( ربع كوب ماء + ملعقه كبيره خل + بيضه )) و إضربيهم خفيف بالشوكه
2- فى إناء العجن ضعى الدقيق و الملح و قلبيهم جيدا ثم ضعى خليط ( الزيت مع السمن ) و إفركيه مع الدقيق بالأصابع لحد ما يختلطوا سويا جيدا جدا و يصبحوا مثل فتافيت الخبز
3- ضعى الخليط الأول ( البيضه و الخل و الماء ) على الدقيق و إعجنيهم ... حتلاقى عجينه ناعمه رائعه جدا و سهلة التشكيل .
4- إقسمى العجين نصفين ...نصف كبير و نصف أصغر ... النصف الكبير ده علشان الوجه و النصف الصغير علشان الطبقه السفليه للفطيره .
5- نفرد النصف الأول بالنشابه على شكل دائره و نرفعه بحرص و نضعه فى صينيه مدهونه
6- نضع ( التفاح المقطع و السكر و قطع الزبد و القرفه ) معا فى طبق غويط و نخلطهم جيدا
7- نضع الخليط ده على أول طبقة عجين
8- نفرد نصف العجين الآخر بالنشابه على شكل دائره كبيره شويه أكبر من قطر الصينيه لأنها حتغطى التفاح و نشيلها بحرص و نغطى بيها طبقة التفاح (( أنا بأطبق قرص العجين الى أربعه و أشيله بحرص و بعدين بأضعه على طبقة التفاح ثم أفرد اللى كنت مطبقاه علشان العجين لا يتقطع أثناء النقل ))
لحد ما تبقى دائره
نغطى بيها طبقة التفاح
9- نضغط العجين من الجوانب لإلصاقه فى الطبقه السفليه للفطيره
10- نخرم بالشوكه الطبقه الأخيره
11- توضع فى فرن حار شويه يعنى أكتر من المتوسط و بتقعد فى الفرن ساعه تقريبا و أحيانا أكتر شويه
12- أثناء السواء سوف تجدى السوائل فى الفطيره زادت و لونها فاتح ...إستنى عليها شويه هى فى الآخر بتتقل و لونها بيغمق و يبقى لوحده كده لون و قوام الكراميل كما هو واضح فى الصور
13- فى أثناء السواء قبل مرحلة النضج مباشرة ... أنا بآخد جزء من السائل ده و أغطى بيه وجهها و أرجعها تانى فى الفرن علشان لونها الخارجى يبقى جميل
14- تخرج و تترك لتهدأ تماما .. و لا تحاولى إنك تقطعيها و هى ساخنه حتى لا تتكسر الطبقه الخارجيه ..و كمان دى لسعتها وحشه أوى علشان الكراميل بيبقى سخن و سايح